= ليه كده بس
- حاسة أنه بقى قيد ومعتقل
= انتى اللى بتقولى كده وانتى متجوزة عن حب وكنتى هتموتى وتتجوزيه
- اكتشفت بعد التجربة ان الجواز بيقتل الحب
= ربنا يبشرك بالخير يعنى انتى مابقتيش تحبيه ؟!
- والله ماعارفة .. بس كل اللى انا عارفاه ومتأكدة منه ان احساسي بيه مابقاش زى زمان
= فهميني اكتر
- يعنى زمان قبل الجواز كانت لمسته بس بتدوخنى وشفايفه بتخلينى أطير فى السما وانسى الدنيا وما فيها .
= ودلوقتى ؟! -
كله بقى عادى .. اللمسة من غير إحساس والحضن بارد
= تفتكرى إيه السبب ؟!
- المشاعر بقت فاترة لما بقيت أحس انه مش ملهوف عليا زى الأول ، مش بيسمعنى كلام الحب والغزل ، بقعد جنبه زى الكرسي وهو فى عالم تانى .
= وانتى ما حاولتيش تقربي منه يمكن فيه حاجة مضيقاه
- ما انا كنت فاكرة كده لكن مع الوقت ومع محاولاتي معاه لاقيت إن ده العادى .. زحمة الحياة وضغط الشغل هو اللى ولد الاحساس بالملل وموت الأشوق .
= وجودك جنبه موت أشواقكم .. طب ازاى ؟!
- ما هى الأشواق بتتولد من بٌعدنا عن بعض واحساسنا الدائم إن فيه حواجز ما بيننا وان الوقت بتاعنا محدود وهيخلص .. كل ده بيولد إحساسنا بشوقنا لبعض .. لٌقانا كل مرة بيبقى له طعم جنان .. بنبقى ملهوهفين نلمس بعض .. الحضن بيبقى دافى ومش عايزينه يخلص .. يعنى زى ما منير بيقول : فرقتنا موت ولقانا ميلاد . لكن دلوقتى ما احنا على طول مع بعض نايمين جنب بعض كل يوم ، فأجسامنا وتلامسهم بقى شئ عادى .. فقدنا إحساس شرارة اللمسة اللى كان .
= وهو كده كمان ؟
- طبعا هو كده كمان .. هى دى طبيعة الجواز .. مش بقولك قيد ومعتقل ..
= يعنى خلاص حبكم راح فى خبر كان وطبيعة الجواز قضت عليه ؟
- اتحول لعشرة .. تعود .. حاجة كده لا ليها طعم ولا لون ولا ريحة حتى !
= وانتى حاسة إنه مابقاش يحبك ؟
- أنا عارفة إنه بيحبني لكن بشكل مختلف .. شكل مش عاجبني .. مش مريحني .. مابقتش مبسوطة .. ملل ملل
= طب ماتكلميه تانى
- انتى مش فاهمة .. هى دى طبيعة الجواز .. التعود .. تعود اللمسة .. تعود الحضن .. حتى لو حاول يكسر الملل بكلمه .. شوية وبنرجع تانى زى ماكنا ازاى هيبقى فيه لهفة فى لقانا واحنا كل يوم مع بعض
= بس احساسك بالزهق من علاقتكم ده أكيد واصل له لأن اللى بيحب احساسه بحبيبه بيبقى عالى .
- ما انا عارفة ، وهو أحيانا بيقولى انتى ما بقتيش تحبيني
= وانتى بتردى عليه تقولى له ايه ؟
- بقوله انت كمان ما بقتش تحبنى .. فيقولى أنا بحبك بس الحب بعد الجواز حاجة تانية .. عشرة وألفة .. والكلام ده .. وأنا مش راضيه بده .. انا مش عايزه الحب العادى .. علشان كده اتخنقت من الجواز .
= بس كل ده أكيد بيأثر على شكل العلاقة ما بينكم .
- طبعا .. مابقاش فيها المشاعر والسخونة بتاعة شهر العسل وأول لقا ما بيننا
= بس الرجل بيحس فى العلاقة الخاصة دى أوى وبيعرف إذا كانت مراته حاسة بيه وعايزاه ولا لأ .
- ما هى دى المشكلة والأزمة الحقيقية اللى أنا عايشاها .
= وبتعملى ايه معاه ؟
- بحاول استدعى أحاسيسي معاه زمان لما كان فيه إحساس ولهفة وشوق
= طب ما تحاولي انك تجددي مودكم .. فى الأجازات تعملوا حاجة جديدة .. دايما تكسري الملل
- جربت كل الكلام ده ودايما بعمل كده .. لكن أنا بتكلم في إحساس أعمق من كده وهو شرارة الحب وفورانه والاشتياق واللهفة على بعض اللى الجواز بيقضى عليهم تماما مهما عملنا من تجديد .. هى دى الحياة بعد الجواز .. الحب موجود لكن له شكله .. زى الفرق ما بين مية النهر ومية البحر .. النهر دايما هادى من غير أمواج .. أما البحر كله أمواج مرة عالية ومرة واطية وساعات هادى .. وفجأة يقلب
ليست هناك تعليقات:
إرسال تعليق