الحبيب السوبر

كل انسان لما بيرتبط وبيحب ، دايما بيتوقع الأفضل من حبيبه .. وطبعا فى بداية الحب بيبقى شايف فى حبيبه كل حاجة حلوة .. بيبقى شايف فيه المميزات وبس .. ما هى دى الحاجات اللى شدته ليه وحببته فيه .. وهى دى الحاجات اللى بتبقى على السطح لأن كل انسان بيحاول يظهر احسن ما فيه أمام الاخرين خصوصا لو كان قارى اعجاب فى عيون حد قدامه بيبقى حريص اوى فى كل تصرفاته .. وحريص اكتر انه ما يظهرش عيوبه .. يعنى جر رجل . لكن اكيد مفيش انسان خالى من العيوب .. وده اللى كتير بينسوه وهما مع حبايبهم وبيبقوا بيحلمو بالحبيب السوبر اللى مافهوش غلطة .. البنات أول ما تحس بإعجاب ناحية حد وتلاقى الاعجاب ده متبادل تبدأ تسرح بخيالها وترسم صورة للحبيب المنتظر .. عايزاه فارس يخطفها على حصان أبيض .. شخصيته قوية .. حكيم متفتح يفهمها من غير ما تتكلم .. يحتويها ويكون كمان رومانسي أوى وكل شوية يفاجئها بحاجة يثبت لها بيها انه بيموت فيها .. بوكيه ورد .. البوم كله الاغانى اللى بتحبها .. هدية رقيقة من غير مناسبة .. ده طبعا غير كلام الحب والهيام والرسايل اللى على الموبايل واللى مليانة اشعار والذي منه .. وطبعا لازم يكون شهم ورجولة وقادر على تحمل المسئولية .. وكريم وطموح ودمه خفيف .. أكيد كل بنت تستاهل اكتر من كده ... اما الشاب لما يحس بالحب ناحية أى بنت وتبدأ هى كمان تبادله نفس المشاعر طبعا هو كمان من حقه يسرح بخياله ويتخيل فتاة أحلامه .. طيبة وجميلة بتفهمه وبتحس بيه .. قادرة تحتويه فى كل حالاته .. ده غير طبعا الدلع والجاذبية والذى منه .. ده جميل أوى أوى .. فى الاحلام والاوهام وبس لأن الإنسان السوبر لسه مالوش وجود فى دنيتنا دى .. وخصوصا فى أيامنا دى اللى السطحية فيها بقت سمة ومنهج حياة .. علشان كده مش لازم ننتظر من اللى قدامنا اكتر من اللازم علشان مانتصدمش ونكره نفسنا وايامنا مع اللى بنحبه لازم دايما نحط فى دماغنا ان المميزات والكلام المتذوق اكيد مخبى وراه شوية عيوب .. والاهم بقى فى كل ده هو اننا نشوف نفسنا قادرين نتوأم مع العيوب دى ونتعايش معاها زى ما الطرف التانى هيشوف ويعرف عيوبنا .. ولا العيوب دى مستحيل التوأم معاها وبالتالى هيكون الانفصال هو الحل الامثل للطرفين .. علاقة الحب والارتباط زى ما فيها احلام ورومانسية ما ينفعش نخليها تفصلنا عن الواقع او عن البديهيات .. يعنى احيانا بنبقى بنعانى لما بنكتشف العيوب اللى فى الطرف التانى ومع ذلك مش قادرين ناخد قرار الانسحاب .. واحنا مش عارفين اننا كده بنصعبها علينا وعلى الطرف اللى معانا .. وفيه احيان تانية بنبقى عايشين فى اوهامنا وبنتوقع دايما الرد المثالى والتصرف المثالى من الطرف التانى ولما بيحصل عكسه او يعنى حاجة مختلفة بنتصدم ونزعل ونقول ازاى ده مش حاسس .. ده مش فاهم .. والحقيقة اننا اللى مش فاهمين ومش عايشين الواقع .. الحياة والنفس البشرية محتاجين التأمل والتواؤم علشان نعرف نتعامل ونعيش .