أزمة رجالة

بنات كتير حواليا بتشتكي من انهم مش لاقيين الانسان اللي يفهمهم ويقدر عقلهم .. الراجل المسئول الناضج .. الحنين العاقل .. قوي الشخصية .. وغيرها من الصفات اللي باين عليها بقت عملة نادرة اليوميمن دول ..

حتى البنات اللي ربنا سهل لها .. وارتبطت تلاقيها دايما بتشتكي من معاناتها من الراجل اللي معاها..

قعدت مع نفسي وفكرت .. وحللت اللي بيحصل مع البنات .. واكتشفت حاجة غريبة أوي وهي إن كل المشاكل بتدور في فلك واحد .. أو يعني كلهم بيصبوا في مركز واحد وهو إن فيه "أزمة رجالة" – مع اعتذاري الشديد للرجال – لكن هي دي الحقيقة.

البنات مفتقدة المعنى الحقيقي للرجولة .

كل بنت عندها أزمة .. يعني واحدة مفتقدة الاحتواء .. حبيبها مش عارف يحتويها ويحس بيها ويقدر مشاعرها .. مش عارف امتى يطبطب عليها .. وامتى يتكلم وامتى يسمعها .. ودايما واضعها في قفص الاتهام .. دايما مقصرة .. دايما مش عارفة تفهمه .. وهو مش بيحاول يفهمها .. مش بيديها اللي هي عايزاه .. الاهتمام .. الحوار .. الاستماع .. كل حاجة يغضب ويخاصمها .. ويطلع يجري ينام !!

وواحدة تانية حبيبها مكبر منها خالص .. راحت فين .. جت منين .. مش مهم .. وهي لو أثرت معاه برضه في السؤال عنه لو تعبان .. أو لو بيمر بمشكلة وما وقفتش جنبه ونسيت الدنيا وما فيها تتقلب الدنيا وماتقعدش ..

أما لما هي تقع في مشكلة فيا عنده شغل .. يا نايم !!

مش عارفة إيه حكاية النوم معاهم .. بيفكروني بالشباب اللي في الأتوبيسات اللي بيعملوا نفسهم نايمين علشان ماحدش يقولوهم قوموا وقعدوا الست الكبيرة دي ولا الرجل التعبان ده .

وبنات تانية بتشتكي من سطحية اللي معاها في التفكير واهتمامه دايما بالمظاهر والقشور ومش لاقيه لغة للتواصل معاه ... مالوش كلمة .. ولو أخد قرار دايما مش بيطلع أده .. أو يرجع فيه !

لكن لو البنت زهقت واتخنقت وقررت تبعد عنه وتسيبه .. يتغير 180 درجة والدباديب تظهر والورد والكلام الحلو والمحايلة والطبطبة !!

طب تفتكرو ايه الحكاية .. البنات هي اللي شكاية ونكدية وبتتبطر على النعمة اللي في ايديهم .. ولا فعلا الشباب بقى مش فاهم ولا عارف يعني إيه رجولة .. وازاي يعامل الست أو البنت ؟!

المفترض واللي كان طبيعي إن الرجل أحكم وأعقل من الست .. والست ناقصة عقل ودين .. هو اللي بيوزن الأمور ويعقلها علشان كده هو اللي بيبقى قبطان الحياة وريسها .. وهي اللي بتستمد منه القوة .. هو العقل .. وهي العضلات .

لكن كل البنات بتشتكي دلوقتي إن الرجالة اتغيرت .. ومش لاقيين واحد كده دماغه كبيرة .. تستمد منه العقل والرزانة .. يحتويها .. يفهمها الصح من الغلط .. يكون ليها الأمان من كل اللي حواليها والطمعانين فيها .

الحكاية كلها إن الكل بقى مستعجل على الارتباط والحب وطبعا الجواز .. البنات بقت خايفة من حكاية العنوسة وقطر الجواز اللي ممكن يفوتها من كتر الكلام عن تفشي ظاهرة العنوسة ..

والشباب من كتر الضغوط اللي عليهم والمستقبل الصعب اللي عارفين انه مستنيهم والإحباط اللي مسيطر عليهم من كل حاجة حواليهم .. خلتهم مكبرين وشايفين ان مفيش حاجة تستاهل التركيز علشانها .

يا بنات خلوا عندكم صبر شويتين تلاتة .. وما تخافوش كل حاجة بتيجى في وقتها .. وبعدين لازم تعرفوا حقيقة مهمة أوى .. وهي إن البنت بتنضج فكريا قبل الولد .. يعني لو بنت معاها ولد في نفس سنها هتلاقي نفسها دايما أعقل وأنضج علشان كده دايما ننصح البنت انها ترتبط بحد أكبر منها بكام سنة علشان يبقى فيه توافق فكري ويقدر يحتويها ..

أما الشباب فمهما كانت الظروف صعبة ولو كنت شايف إن مفيش حاجة تستاهل حواليك إنك تركز وتبقى رجل على حق .. فخللي بالك إن انت نفسك تستاهل .. كفاية إن اللي حواليك يقولوا عليك رجل .. وإن كل البنات اللي حواليك تبقى تتمنى تتكلم معاك وترتبط بيك .. ولا إيه ؟؟؟

الاحتياج لوحده مش كفاية

الاحتياج للآخر احساس جوانا كلنا .. ومن أول مشاعرنا ما بتتفتح واحنا بنفضل ندور حتى من غير ما نقصد على نصنا التانى .

بندخل فى تجارب ونعيشها يا نكمل فيها ونبقى ارتحنا ولاقينا نصنا التانى وتبقى اتفتحت لنا مفاتيح السعادة الأبدية .. أو نلاقى إن اختيارنا طلع غلط فنهرب من التجربة ونبدأ من جديد رحلة البحث عن الإنسان اللى يشاركنا حياتنا بحلوها ومرّها .

لكن مش كل الناس بتعمل كده وتهرب لما تكتشف إن اختيارها مش مظبوط  حتى لو فضلت تدور عليه عمرها كله .. فيه ناس خوفها من الوحدة وشدة احتياجها لوجود انسان يكسر برودة الوحدة اللى فى حياتها بتخليها ترضى بأى حد لمجرد الونس .

بس تفتكروا ده ينفع ؟!

ينفع نرتبط بواحد ونربطه بينا بالرغم من كونه مش مناسب لينا ولا حتى أحاسيسنا معاه ؟!

 أصعب شئ فى الحياة إننا نكتشف إن حب شخص لينا مجرد وهم كبير وكدبة كنا عايشين فيها ، وأد إيه الجرح بيبقى غائر أوى ومحتاج كتييير أوى علشان يخف ويتنسى ..

 للأسف هو ده اللى بنعمله فى نصنا التانى اللى واخدينه كونس بدل ما نعيش لوحدنا .. وطبعا طالت المدة ولا قصرت بتتعرف الحقيقة لأن الإحساس بالحب من عدمه لازم يتحس ويوصل .. لو قدرنا نمثل شهر اتنين تلاتة ، مش هنقدر نمثل العمر كله .. فيه حاجات بتتحس ولازم تتطلع من القلب علشان توصل للقلب .. الاهتمام .. الخوف على الاخر .. تفكيرنا فيه قبل ما نفكر فى نفسنا .. كل دى حاجات صعب تتمثل .. ولو حصلت مرة مش هتحصل التانية .

وكده مش هنبقى بنظلم بس اللى معانا ومعيشينه فى الوهم كده احنا كمان بنظلم نفسنا لأن ممكن يبقى حبنا الحقيقى موجود بس ارتباطنا بالشخص الغلط هو السد اللى قدامه ..

ليه ما نصبرش لغاية ما ييجى لنا الإنسان المناسب اللى يحبنا بجد واللى احنا كمان نحبه ونخرج له مشاعرنا الحقيقية من غير تمثيل ولا خداع .. صدقونى طعم الحب الحقيقى يستاهل اننا نستناه حتى لو العمر كله .   

قررت الانحراف

دخلت عليا المكتب بزاعبيبها وهى بتقولى : بصى بقى انا زهقت وقررت أعمل اللى أنا عايزاه وقت ماأنا عايزه

حاولت امتص غضبها ورديت عليها بهدوء : من حقك طبعا تعملى اللى انتى عايزاه فى الوقت اللى انتى عايزاه طالما انك مش هتضايقى حد .. ده حقك يا بنتى .. ايه بس مالك

كملت كلامها برضه بعصبية : أنا تعبت من الوحدة اللى أنا فيها ومن قعدتى مستنية الحبيب المجهول أنا خدت قرار ومش هرجع فيه

-- خير

قالت بحدة : أنا هنحرف خلاص

ضحكت ورديت : ازاى ؟!

قالت : يعنى هخرج وأصاحب واتعرف على شباب يعنى اسد الفراغ اللى أنا عايشة فيه

-- طب وإيه الانحراف فى انك تصاحبى أو تكلمى شباب .. ما بنات كتير بتعمل كده .. طب مانا اهوه متجوزة وليا أصحاب شباب وجوزى عارف ومفيش مشكلة .. وبكلمهم وهو كمان بيكلمهم .. ايه الغلط

ردت فى ذهول : ايه ده عادى كده جوزك سامح لك تكلمى رجالة عادى

-- هو انا بتكلم معاهم فى ايه يعنى .. احوال الدنيا .. اعرف اخبارهم ويعرفو اخبارى .. ايه الغلط فى كل ده

قالت : بس جوزك مش خايف حد يقولك كلمة كده او يلمح بحاجة كده او كده .. احنا برضه مجتمع شرقى

-- بصى اولا جوزى واثق فيا جدا وعارف ان الست اللى بتحترم نفسها بيحترمها الناس .. ثانيا أنا نفسي مش بسمح لحد يوصل معايا لأكتر من زمالة إلا لما أعرف انه انسان متفتح وفاهم الفرق بين الصداقة البريئة والكلام الفاضى وكمان انه محترم

قالت : ايه ده يعنى ده عادى مش انحراف .. احنا مجتمعنا اتقدم اوى كده وانا مش واخده بالى ؟!!

-- حبيبتى مفهوم الانحراف ده نسبي .. يعنى اللى انتى ممكن تعتبريه انحراف ممكن واحدة تانية تعتبره سلوك طبيعى وتقول كمان على اللى بيعترض عليه متخلف

ردت : يعنى ايه

-- هديكى مثال .. مش فيه ناس أو شريحة من المجتمع عندها شرب السجاير للست أو للبنت عادى جدا وحرية شخصية .. لكن ناس تانية بتعتبره قلة أدب وعدم تربية وقمة الانحراف؟

ردت بعفوية : أه طبعا

-- هو ده اللى أقصده .. أن السلوك أو التصرف المنحرف بنحكم عليه من خلال المجتمع اللى احنا عايشين فيه .. والطبقة الاجتماعية اللى احنا عايشين فيها .. مفيش سلوك منحرف فى المطلق .. المهم بجد ان انتى تكونى عارفة اللى انتى بتعمليه ده صح ولا غلط .. انتى بس اللى تقدرى تحكمى على سلوكياتك وتصرفاتك .. ولا إيه ؟

لسه مذهولة وبترد : طب يعنى ايه اكلم شباب ولا عيب ولا ايه ؟!!

-- ما انا قلت لك فيه اعتبارات انتى اللى فى ايدك تحدديها

خرجت من المكتب وهى حيرانة وشكلها كده هتغير مفاهيم كتير اوى فى دماغها