مذكرات زوجة وأم

انا طول عمري بعاني من عدم القدرة على التنظيم..دايما بعمل أي حاجة في اخر وقت ممكن اعملها فيه، فبكون مستعجلة ومرتبكة 

وطبعا بعد ما بخلصها بحس بالتعب والإجباط

واقول لنفسي المرة الجاية هبدأ من بدري اوعمل حساب للوقت.

وارجع الف في نفس الدايرة من جديد... نفس البدايات ونفس النهايات..بدون توقف

علشان كده دايما مكتئبة وحاسة اني ورايا حاجة ومش فاضية

وعلى الرغم من كل ده ساعات بحط تحديات لنفسي.. يعني حاجات احققها في وقت محدد.

والله الطريقة دي ساعات بتجيب معايا نتيجة كويسة جدا، وبتحمسني، وبنتهي في زمن قياسي من حاجات كانت بتاخد معايا ساعات طويلة، فاكتشفت ان الطريقة دي كويسة جدا في اني انجز مهامي، ويبقى عندي وقت فراغ كمان.

اكتشفت حاجة تانية مهمة جدا، وهي خطة العمل، اه والله بجد.

لما بحط خطة عمل للي انا المفروض اعمله من حاجات بئة في الشغل، وحاجات في البيت، ومشاوير، وأي حاجة، حتى مهام تنظيف

 الشقة، قبل ما أنام بالليل.

وبتبقى الخطة دي بالورقة والقلم كمان، لأني بحب الكتابة جدا، بنجز فعلا اللي ورايا وبرضه في وقت قياسي.

السر الحقيقي في كل الاكتشافات دي، هي المداومة عليها، حتى لا نفقد طاقتنا وحبنا للحياة وإقبالنا عليها، زي ما بيحصلي ساعات.

لأن الشعور بالإحباط سببه الحقيقي عدم قدرتنا على تنظيم وقتنا وإنجاز كل اللي ورانا من مسئوليات وشغل، سواء في البيت أو بره البيت، فتتكوم على دماغنا المهام، ونبقى مش عارفين نبدأ منين، ولا نخلص أيه الأول.

وعلشان ننجز بنعمل شوية من كل حاجة ورانا، وتكون المحصلة في الأخر، ولا حاجة خلصت، واليوم هو اللي خلص.

ونبدأ اليوم اللي بعده في دايرة جديدة مفرغة، وهلما جر.

يبقى الحل في اننا الأول نرمي كل الماضي بلخبطته والفوضى اللي ملياه..ونبدأ مع نفسنا صفحة جديدة، وده اللي هعمله من النهارده.

ونعرف ان ارادتنا ووتصميمنا على الانجاز هيساعدونا كتير وهيريحونا كتير في الأيام اللي جاية.

نجيب ورقة وقلم ونكتب فيها كل الحاجات اللي ورانا، كل حاجة وأي حاجة، حتى لو عايزين نستحمى أو نروح للكوافير.

نبدأ نرتب الاولويات من الأهم، فالمهم، والأقل أهمية، وهكذا.

ممكن نعلق الورقة ع التلاجة أو ع الدولاب.. انا بعمل كده.. بحيث كل ما نخلص من مهمة نشطب عليها.. وصدقوني، كل ما نشطب على مهمة هيزيد حماسنا للإنجاز، (ده عن تجربة)، وهنلاقي نفسنا بالفعل خلصنا كل الليورانا وعندنا وقت فراغ كمان.

وما ننساش قبل ما ننام نكتب مهام اليوم اللي جاي.. وبكده هنلاقي وقت نلعب ع الكمبيوتر أو نقرا.. او حتى ننام.

انا هبدأ من الليلة دي وربنا يقدرني على المداومة.. وهرجع بعد كام يوم اسجل تجربتي سواء بالنجاح او الفشل.. وان شاء الله هيبقى نجاح وبتفوق.