معاهدة سلام

خناقات وخصام وتهديدات بقرارات صعبة هى دى كانت السنة اللى فاتت بالنسبة لصاحبتى وجوزها .. وكتير اتفقوا عل الطلاق – لاقدر الله- بس الحمدلله كانوا بيعقلوا فى أخر لحظة ، الغريب فى الأمر أنهم متجوزين بعد قصة حب جامدة جدا ولا أفلام زمان الرومانسية .
المهم ... وعلشان أمر صاحبتى دى يهمنى قررت اتدخل وأصلح الأمور خصوصا مع بداية سنة جديدة ، وعزمتها هى وجوزها ليلة رأس السنة وعملت لهم شوية أجواء رومانسية يعنى يمكن تصحى جواهم ذكرياتهم الجميلة وتفكرهم بقصة حبهم اللى كان بيتضرب بيها المثل .
بعد العشا والذى منه خدتها وانزويت بيها فى حتة على جنب وبدأت كلامى معاها بسؤالى عن معرفتها بجوزها وازاى جات وشرارة الحب امتى اشتعلت ، وكنت بحاول أصحى فيها كل ذكرى جميلة جمعت بينهم ، وسألتها عن أجمل الذكريات وأطرف مواقف حصلت لهم أيام الخطوبة وفى بداية الجواز .. أيام العسل يعنى ... وبدأت أحس إن عينيها بتلمع بالحب وهى بتحكى وده معناه إنها لسه بتحب جوزها لكن هموم الحياة ومشاكلها هى اللى خلقت الخناقات وكانت هتنهى قصة حب جميلة.
بعد ما صحيت جواها أجمل ما فى جوزها قلت لها الحب الحقيقى يستاهل نعمل أى حاجة عشان نحافظ عليه .. يعنى نفوت حبتين .. ندلع حبتين .. نطنش تلات حبات عشان زى ما بيقولوا المركب تمشى ..
لكن لما يبقى كمان فيه قصة حب جميلة سبقت الجواز لازم نحارب ونقاتل عشان نبقى عليها
أهم ما فى الموضوع إنك تبقى متأكدة إن شريك حياتك بيحبك بجد لكن مشاكل الحياة هى اللى بتخليه يزعلك ، يعنى المهم يكون الأساس سليم .
تعالوا مع بداية سنة جديدة نكتب معاهدة سلام ما بينا وما بين حياتنا الزوجية ، ومهما كانت الخلافات كبيرة ومهما وصل مداها كلمة حلوة هتطفى أكبر نيران وتدوب أعلى جليد .. بس المهم نبدأ .. بلاش كلمة هو اللى يبدأ وهو اللى يصالحنى .. كفاية تعرفى إن انتى اللى فى قلبه وانه لسه بيحبك بجد .

لأ ... الحب مش أعمى

قالوا لنا زمان مراية الحب عامية ، وإن اللى بيحب مش بيشوف عيوب حبيبه وانه بيبقى فى عينيه ملاك .. وعلى رأس المؤمنين بالكلام ده الرائع وليم شكسيبر لما قال حكمته المشهورة "الحب أعمى والمحبون لا يرون الحماقة التي يقترفون" ..
مع كل الاحترام للرائع شكسيبر إلا انى شايفة الكلام ده كله مش صحيح بالمرة .. ويمكن يكون العكس هو اللى صح .. مراية الحب مفتحة أوى .. وناصحة جدا وعيونها بتشوف بالبعد التالت كمان .. أيوه بتشوف اللى العين مش بتشوفه .. لأنها بتحس .. وده المهم .
واللى بيحب بيبقى قادر انه حتى يقرا أفكار حبيبه مش بس يعرف عيوبه ومميزاته .
بس المسألة لها أبعاد كتيرة ومختلفة .. أولاً مسالة العيوب دى نسبية .. يعنى اللى انت تشوفه عيب قاتل ممكن غيرك يشوفه ميزة .. او على الأقل حاجة عادية يقدر يتعامل معاها ويحتويها بكل سهولة .
مثلا العصبية .. فيه بنات ماتستحملهاش وماتقدرش تعيش مع واحد طول الوقت بيشخط وينطر .. وفيه بنات بتموت فى الراجل اللى كده وتعتبر ان ده (حمشنة) وقوة شخصية .. نقيس على ده حاجات كتير أوى .. زى الهدوء أو التدخل فى كل صغيرة وكبيرة .. ده حتى البخل فيه ناس بتشوفه حرص .
كمان ممكن العيب اللى فى الواحد يبقى قدامه ألف ميزة تخلينا نتغاضى عنه ونتأقلم عليه .. مش بيقولو لاجل الورد يتسقى العليق ..
وفيه كمان بعد تانى مهم أوى خصوصا اليومين دول .. وهو ان الحب بقى فيه أزمة وبقى قليل أوى .. فالواحدة ما بتصدق تلاقى واحد يحبها بجد وناوى على جواز فبتمسك فيه وبتبقى مستعدة تتقبل أى حاجة منه وبتستحمل كل عيوبه .. ولسان حالها بيقول ضل راجل ولا ضل حيطة . وبتبقى عارفة انه مليان بلاوى وعيوب بس هتعمل ايه عايزه تتجوز قبل القطر ما يفوتها .. وتلاقيها بتصبر نفسها وتقول المهم ان هو بيحبنى وهيحافظ عليا ويحمينى واكيد مع الوقت انا كمان هحبه .. ومش مهم أى حاجة تانية ..
كل ما فى الامر اننا بنبص للحدوتة من بره .. من رؤيتنا إحنا الشخصية وبنقيم الواحد على مزاجنا احنا .. ونقول هى مستحملاه ازاى .. أو هو قادر يعيش مع الانسانة دى ازاى .. وما نعرفش ان فى الحب الأمر مختلف ..
لأن كل واحد بيعرى نفسه قدام اللى بيحبه وبيورى له اللى بيخبيه عن كل الناس .. فكل واحد بيشوف فى حبيبه اللى ما حدش يعرفه عنه ..
بيشوف عيوبه زى ما بيشوف مميزاته .. بس هو بيحبه كده على بعضه زى ما هو ..
ماهو برضه بالعقل كده هو فيه حد ملاك وخالى من العيوب .. كلنا فينا عيوب .. بس المهم اننا نقدر نتعامل مع العيوب دى أو حتى نحاول نغيرها ..

الحب عنده اهتمام .. لكن عندها كلام

الحب احساس بيتمنى يعيشه كل انسان .. وبيفضل يحلم باليوم اللى هيلاقى فيه نصه التانى علشان يعيش معاه احلى ايامه .. الحب بيبدل احساسنا بكل شئ حوالينا .. بيخلينا نلاقى كل حاجة لها طعم تانى .. جديد .. احلى صحيح علاقة الحب بتجمع قلبين .. كل واحد فيهم بيلاقى نفسه فى التانى لكن تعبير الرجل عن حبه واحساسه بيه مختلف عن تعبير البنت واحساسها بحبها .. واللى بيحتاجه الرجل من الحب غير اللى بتحتاجه البنت فيه مقولة بتقول : "المرأة بتعشق من اذنيها" يعنى البنت دايما بتحب تسمع الكلمة قبل ما تشوف الفعل ...

مع ان مسألة ان الحب افعال ما يختلفش عليها اتنين .. لكن البنت بتحب تسمع الكلمة الحلوة .. بتحب دايما حبيبها يعبر لها بالكلام عن حبه ليها .. وكمان يترجم الكلام ده لأفعال وتصرفات .. يمكن عشان البنت لما بتحب .. بتحب بكل قلبها .. وعقلها كمان دايما بتبقى عايزه حبيبها يقولها بحبك .. ويسمعها الكلمة دى على طول .. وحشتينى .. مش قادر اعيش بعيد عنك .. الكلام ده بيدوبها .. ويخليها تلمس السما بإيديها .. فى الوقت نفسه بتبقى عايزه تحس باهتمامه بيها طول الوقت .. يسأل عليها .. يكلمها .. يبعت لها "message" .. مهما مر وقت على علاقتهم .. حتى ولو بعد 100 سنة جواز بتبقى عايزاه يحبها بنفس الأسلوب .. وتزعل جدا وممكن تنجرح لو سمعت كلمة "احنا كبرنا" .. او "ده حب مراهقين"البنت او الست مش بتقتنع بالكلام ده وبتفضل محتاجة للرومانسية فى الحب طول عمرها

وزى ما بيقول استاذنا انيس منصور (أروع القصائد لا تساوي شيئاأمام أي كلام يقوله رجل تحبه امرأة)

أكيد الراجل هو كمان بيحب يسمع كلام جميل من حبيبته لكن الراجل عنده الفعل أهم .. دايما بينتظر من حبيبته انها تعبر عن حبها باهتمامها بيه .. فى كل حاجه بتعملها .. و أهم حاجه عنده انه يحس انه رقم واحد فى حياتها .. و انها على استعداد انها تتنازل عن أى حاجه فى حياتها علشان خاطر عيونه .. شغلها .. أصحابها .. طموحها .. حتى دراستها ..لأن الراجل مش ممكن يتنازل عن كونه محور حياتها .. مع انه هو نفسه ما يقدرش يعمل كده

- ( لأن الحب هو كل حياة المرأة .. لكنه جزء فقط من حياة الرجل )

الرجل الشرقى عنده مسئولياته اللى مش ممكن يتخلى عنها ..زى شغله ونجاحاته .

بس على فكرة حتى البنت نفسها ما تقبلش ان الراجل اللى بتحبه يتنازل عن طموحاته او عن كونه مسئول حتى لو كان علشان خاطرها .. - فيه حاجة كمان مهمة جدا عند البنت لايمكن تتنازل عنها فى حبها .. وهى الامان .. فمهما كانت البنت صلبة وشخصيتها قوية دايما بتكون محتاجة لرجل تتسند عليه .. راجل تبقى عارفة انه قادر يحميها وقت اللزوم .. ويسد فى اى ازمة ممكن تتعرض ليها .. تحس انها ممكن تغمض عينيها وهى جنبه من غير ما تخاف .. - لو كان الرجل مع حبيبته فيضان من الحنان والاحتواء والعطف .. وبتفتقد معاه الاحساس بالامان .. فمهما طالت علاقتهم لازم البنت هتهرب منه وتدور على الاحساس بالامان مع غيره .. البنت جواها احساس مستمر بالضعف والاحتياج مهم انها تكمله مع الرجل اللى بتحبه ..

يعنى البنت محتاجة من الرجل الكلمة الحلوة .. الى تترجم لتصرفات .. ومحتاجة الامان .. والرجل محتاج الاهتمام والاحتواء .. وانه يحس انه الاول والاخير فى حياة حبيبته ..

وزى ما بيقول تشيكوف : اذا كان في وسعك ان تحب ففي وسعك أن تفعل أي شئ

لو يتحبيه اعملى مكسوفة

نظرة .. فابتسامة .. فإعجاب .. فكلام .. ويحصل الانسجام .. ويبدأ التعارف ويوم ورا يوم نلاقى نفسنا واقعين فى أجمل فخ .. وأحلى مطب .. وهو الحب
الشاب يصارح حبيبته بحبه وبمشاعره ويسمعها أرق كلام .. والبنت تفتح مسامها ومشاعرها لأجمل أحاسيس .. يقربوا من بعض ويستكشفوا طباع بعض ويحصل التعود والعشرة .. وكل واحد يكشف نفسه قدام التانى .. بيحب ايه وبيكره ايه .. بيؤمن بإيه .. وبيرفض ايه ويقبلوا بعض بالمميزات والعيوب
لكن بيفضل جوه كل بنت نموذج للشاب المثالى .. يعنى اللى يقدر يتحمل المسئولية وشخصيته قوية .. فادر يحميها ويحتويها .. وده ما يمنعش ان فيه عيوب لو ظهرت فى حبيبها هتقدر تتعايش معاها وتتقبلها زى العصبية والاندفاع .. قلة الصبر .. قلة الكلام او كتره .. وكل واحده حسب اللى تقدر تتحمله من عيوب .. او تقدر تتعامل وتتعايش معاها
كمان الشاب بيبقى راسم فى خياله صورة للبنت اللى عايز يرتبط بيها ولما بيلاقى نصه بيبدأ يطابقها بالصورة اللى فى خياله .. اكيد مش هيحصل التطابق الكامل وهيلاقى اختلافات كتير بين الخيال والواقع .. وفيه حاجات بيقول فيها وايه يعنى انا ممكن اغيرها .. وحاجات بيلاقيها احلى من من الصورة اللى كانت فى خياله .. لكن فيه حاجات لو اكتشفها ممكن يغير رأيه ويعيد حساباته ويقرر فى النهاية الهروب .. مهما كانت البنت عجباه..
زى مثلا فرض الرأى وحب السيطرة .. لكن ده ما يمنعش ان فيه شباب شخصيتهم ضعيفة ومهزوزة وبيتأقلموا مع البنات المفترية .. ونفس الشئ بالنسبة للعصبية .. فيه شباب بيقدروا يكسروها فى البنات وفيه شباب بيستسلموا .. وفيه بيهربوا زى ما قلنا .. اما الحاجة اللى مالهاش حل وبيخاف منها اى شاب مهما كان مودرن او متفتح .. او حتى متربى فين .. هى الجرأة الزايدة ..
اى شاب طالما انه شرقى بيخاف ويقلق جدا من البنت الجريئة اوى .. اللى ما بتعملش حساب لكلام الناس ونظراتهم ليها .. او سوء ظنهم فيها .. وبيخافوا اوى من الجملة الشهيرة اللى بنات كتير بقت حفظاها وبترددها اليومين دول "طالما انى متأكدة من نفسى وانى مش باعمل حاجة غلط مايهمنيش الناس" .. الجملة دى مجرد ما يسمعها اى شاب من البنت اللى بيحبها بيحط تحتها مليون خط .. ويبدأ يرصد تصرفات البنوتة بتاعته ويعيد حساباته .. ويفكر مليون مرة قبل ما يرتبط بيها .. ممكن يفضل مصاحبها لغاية ما ياخد القرار النهائى لكن صعب جدا انه يكمل معاها حياته لأنه بيفضل دايما قلقان من اللى ممكن تعمله .. خصوصا من تصرفاتها قدام اهله واصحابه .. وطول ما هى بعيدة عن عينيه بيتوتر وعقله بيروح فى الف اتجاه .. وطبعا مين يستحمل العيشة دى .. فبيقرر ينهى حياة القلق وعدم الاستقرار دى مهما كان بيحب البنت وعجباه..
عاشان كده لازم البنت تاخد بالها جدا من تصرفاتها مع الشاب اللى بتحبه وتحافظ دايما على خجلها بلاش العفوية الزايدة علشان دايما بتتفهم غلط .. لازم البنت تعرف ان الناس مادخلتش جوه عقلها وضميرها علشان يعرفوا قصدها .. الناس ليها اللى شايفينه وطبعا هى كمان نفس الحكاية .. لو كل بنت متحررة شويتين قبل ما تتصرف تخيلت نفسها قدام مراية واتفرجت على نفسها بعيون الناس اكيد هتاخد بالها من تصرفاتها اكتر .. ولو كمان كانت عايزة تحافظ على الانسان اللى ارتبطت بيه تفكر شوية قبل ما تتصرف اى تصرف .. لكن لو كان الموضوع مش فارق معاها ومصممة انها تلاقى واحد يقبلها كده زى ما هى .. فهى حرة .. بس تعرف انها هتستنى كتير شويتين لما تلاقى الانسان ده .. او ممكن بقه تستورده من بره .. لازم كل بنت تحسس الشاب اللى بيحبها انها بتحافظ على تصرفاتها قدام الناس لأن ده معناه انها بتحافظ على صورته هو قدامهم لأنها منسوبة ليه .. احنا فى الاخر مجتمع شرقى ليه طباعه وعاداته اللى مش بتتغير ولا بعد الاف السنين ..