كلام من قلبي لقلبك

اوعي تسلمي قلبك إلا للي بيقدر يقرا اللي جواكي.. وبيعرف انتي عايزه ايه من غير ما تتكلمي – مش علشان هو ذكي وبيفهمها وهي طايرة – لأ ..
علشان بيحس بيكي وبيقدر مشاعرك..
هو ده الحب.. انك تلاقي الإنسان اللي يقاسمك كل حاجة في حياتك حتى مشاعرك وأحاسيسك .. بيفكر فيكي قبل ما يفكر في نفسك.
بيفرق معاه أوي زعلك .. دايما عنده وقت يسمعك.
وعلى فكرة مفيش بديل إلا إنك تستني الإنسان ده.. بلاش افتقادك لوجود إنسان في حياتك يخليكي ترضي بأول واحد يقابلك ويحاول يقتحم حياتك.
قلبك مش هيتحمل تجارب .. صدقيني .. وهتوصلي لمرحلة من استهلاك المشاعر، اللي تخليكي حتى مش عندك جهد ولا طول بال للعطاء مع اللي يستاهل.
قلبك يستاهل انك تحافظي عليه لغاية اما يوصل اللي يقدره ويعرف قيمته.
عارفة انك هتقولي إن ده معناه إن سنين عمرك ممن تنسال من بين ايدين الزمن.. من غير ما يظهر الشخص ده.
وإن زمننا ده اختفى منه الفارس ابو حصان أبيض والعاشق الولهان.

لكن أنا مش بقصد انتظارك للمحب الولهان والفارس الهمام..
لكن برضه ما ترضيش بأقل من شخص يقدم لقلبك المشاعر الجميلة.. يهتم بيكي فقط لشخصك.. مش لأنه بيدور عن زوجة يكمل معاها الشكل الاجتماعي لحياته.. وينجب منها ولاد يخلدو ذكراه في الحياة.
اللي تشعري معاه بالأمان المعنوي.. مش المادي.
اللي تحسي أنه هيكون سند وضهر .. مش مجرد "ضلا بديلا لضل الحيطة".

#ريهام_الصواف